‘हिंसा’ शब्द असंसदीय नभएको भन्दै रेकर्डबाट हटाउन नपर्ने सभामुख देवराज घिमिरेले बताउनुभएको छ । साथै उहाँले आउँदा दिनमा शब्द छनोटमा ध्यान दिन पनि अनुरोध गर्नुभएको छ ।
गएको भदौ १२ गते संसद् बैठकमा नेकपा एमालेका सांसद योगेश भट्टराईले माओवादी जनयुद्धलाई हिंसाको टिप्पणी गर्नुभएको थियो । परामर्श समिति र संसद् सचिवालयको परामर्श लिएर हिंसा शब्द अभिलेखबाट हटाउन नपर्ने निर्णय लिएको सभामुख घिमिरेले बताए । आजको प्रतिनिधिसभा बैठकमा सचिवालयको निर्णय सुनाउँदै उहाँले हिंसा शब्द हटाउन नपर्ने बताउनुभएको हो ।
बैठकमा प्रमुख प्रतिपक्षी दल नेकपा माओवादी केन्द्रका प्रमुख सचेतक हितराज पाण्डेले हिंसा शब्द संविधान र कानुन विपरीत भएको भन्दै आपत्ति जनाए । लगत्तै एमाले सांसद रघुजी पन्तले सभामुखको रुलिङमा प्रश्न उठाउने विषय नभएको उल्लेख गर्नुभयो । माओवादीका सांसदहरूले उठेर आपत्ति जनाएपछि आजको बैठक स्थगित भएको छ ।
प्रतिनिधिसभाको अर्को बैठक आउँदो ३० गते आइतवार दिउँसो १ बजे बस्नेछ ।
