शिवराज आचार्य धादिङ (निलकण्ठ) । धादिङको निलकण्ठ नगरपालिका ३ रिजालगाउँमा प्रवलिकरण गरिएको भुकम्प प्रतिरोधी घर एक कार्यक्रमका बिच हस्तान्तरण गरिएको छ । विभिन्न सँघ सँस्थाको सहयोगमा प्रबलिकरण गरिएको दुईतले ढुँगा माटोको घर स्थानिय रुद्रकुमारी रिजाललाई हस्तान्तरण गरिएको हो । युके एड, यु ए न ओ पि स, बिल्ड चेन्ज र बिबिसी मिडिया एक्सनको सहयोगमा गत जेठ २३ गते देखी प्रबलिकरण गर्न थालिएको घर साउन १८ गते सम्पन्न भएपछि आईतबार जिल्ला आयोजना कार्यान्वयन ईकाई भवन तथा आवासका प्रमुख कोषनाथ अधिकारी र वडा अध्यक्ष होम प्रसाद रिजालले सँयुक्त रुपमा प्रवलिकरण सम्पन्न प्रमाणपत्र सहित हस्तान्तरण गरिएको छ । यस अघि विपन्न, एकल महिला तथा वृद्ध रुद्रकुमारी रिजाललाई उहाँको अवस्थाको मुल्याँकन गरेर सँस्थाले प्रवलिकरण गर्न घर छनौट गरेको थियो । घर प्रवलिकरणका लागि ३ लाख ८२ हजार ६ सय आठ रुपैँयाको लागतमा घर प्रवलिकरण भएको कार्यक्रममा जनाईएको छ । हस्तान्तरण कार्यक्रममा बोल्दै बिल्ड चेन्जका प्रोगाम म्यानेजर अनिल बस्तेतले उदाहरणको रुपमा घरलाई प्रवलिकरण गरी आज हस्तान्तरण गर्न पाउँदा खुसी लागेको बताए । उहाँले घरलाई बलियो तथा मजबुत बनाई प्रवलिकरण गरिएकाले अन्य नयाँ घर जस्तै यो घर भुकम्प प्रतिरोधी रहेको बताए । यस्तै बिल्ड चेन्जका ईन्जिनियर विष्णु प्रसाद पाण्डेले धादिङको निलकण्ठ ३, बेनिघाट रोराङ ५ र गजुरी ५ मा ३ वटा घर प्रवलिकरण गरेको बताए । यस्तै अहिले सम्म ३२ जिल्लामा १ सय १४ वटा घर प्रवलिकरण गरिएको पनि उनको भनाई छ । यस्तै स्थानिय घर धनि रुद्रकुमारी रिजालका छोरा रिसी रिजालले भुकम्पको ४ बर्ष सम्म पनि घर निर्माण गर्न नसकेको र विभिन्न सँघ सँस्थाको सहयोगले घर निर्माण हुँदा आफुहरुलाई खुसी लागेको बताए । भुकम्प अघिको जस्तै २ तले घर जस्ताको तस्तै आफुहरुले पाउँदा उनले खुसी प्रकट गरेका छन् । यस्तै स्थानिय जानुका रिजालले आफ्नो ढलान गरेर बनाएको भन्दा प्रवलिकरण गरिएको घर निकै नै मन परेको बताईन् । यो नमुना घरका कारण पुरानो ढुँगामाटोको घर पनि प्रवलिकरण गर्दा बलियो र भुकम्प प्रतिरोधी हुन्छ भन्ने स्थानियले थाहा पाएको बताए । यसैगरी कार्यक्रममा बोल्दै जिल्ला आयोजना कार्यान्वयन ईकाई भवन तथा आवासका प्रमुख कोषनाथ अधिकारीले प्रवलिकरणका कारण हाम्रो मौलिकता र सँस्कृतीको जर्गेना भएको भन्दै कम खर्चमा पहिलेको जस्तै ढुँगामाटोको बलियो घर निर्माण भएको बताएका छन् । अधिकारीले जिल्लामा २० वटा प्रवलिकरण गरिएको घर निर्माण भएको पनि बताएका छन् । उनका अनुसार पुर्ण क्षतिमा परेका ७३ प्रतिशतले तेस्रो किस्ता लिईसकेका छन् । यस्तै वडा नम्बर ३ का वडा अध्यक्ष होम प्रसाद रिजालले प्रवलिकरण गरिएको ढुँगा माटोको घरको बारेमा सुरुमा अनभिज्ञ रहेको भन्दै अहिले घर निर्माण भएर हस्तान्तरण गर्न पाउँदा खुसी लागेको पनि बताए । २०७६ भदौ १ गते प्रकाशित