काठमाण्डौ,
फिल्म ‘छ माया छपक्कै’ को पहिलो गीत सार्वजनिक भएको छ । शुक्रबार बिहान ८ बजे यूट्युबमा सार्वजनिक गरिएको ‘जुनको जुनेली’ बोलको लोक शैलीको गीतमा फिल्मका प्रमुख कलाकारहरु दीपकराज गिरी, जितु नेपाल, केदार घिमिरे, केकी अधिकारी र सुपुष्पा भट्ट फिचर्ड छन् । गीतमा बसन्त थापा र मिना निरौलाको स्वर छ ।
राजेन्द्र थापाको शब्द रहेको गीतमा गायक बसन्तकै संगीत छ । गीतमा दीपकराज र केकीबीच अंकुराउँदै गरेको प्रेमलाई उनिएको छ । साथमा, जितु र सुपुष्पाको प्रेम भाव पनि गीतले बोल्छ निर्माण टिमले फिल्मको प्रदर्शन मिति पनि घोषणा गरेको छ । फिल्म असोज २४ गतेबाट प्रदर्शनमा आउने भएको छ ।
बुद्धि तामाङ र रजनी गुरुङको पनि अभिनय रहेको फिल्मका कार्यकारी निर्माता केदार प्रसाद घिमिरे हुन् । निर्देशक लामाकै कथा रहेको फिल्ममा दीपकराज गिरीको पटकथा रहेको छ । संवादमा उनलाई केदार प्रसाद घिमिरे, जितु नेपाल, अभिमन्यू निरवीले सघाएका छन् । रोशन श्रेष्ठको द्वन्द्व रहेको यस फिल्ममा निर्देशक लामालाई दीपाश्री निरौलाले निर्देशनमा सघाएकी छन् ।
हरि हुमागाईंको छायांकन, कविराज गहतराजको कोरियोग्राफी र विपिन मल्लको सम्पादन रहेको फिल्मले ४० वर्ष उमेर अन्तरालको प्रेम कथा वाचन गर्ने बताइएको छ । जेठमा प्रदर्शनमा आएको फिल्म 'जात्रै जात्रा' पछि सुस्ताएको नेपाली फिल्मको बजारलाई यो फिल्मले केही हदसम्म व्यूँत्याउने अपेक्षा गरिएको छ
आमा सुरस्वती मुभिज, रोहित अधिकारी फिल्मस् र आईएमईबीच सहकार्य भएर निर्माण भएको यस फिल्मका निर्माता रोहित अधिकारी हुन् । पहिलो पटक दीपक-दीपाको समुहले बाहिरी ब्यानरसँग सहकार्य गरेर ‘छ माया छपक्कै’ बनाएको हो । नाफाको ५० प्रतिशत लिने शर्तमा उनीहरुले यो फिल्म गरेका हुन् । फिल्मलाई रिलिज अगावै ‘स्योर सट’ हिट मानिएको छ ।
भिडियो हेर्नुहोस्
[embed]https://youtu.be/HsVJ4asMZ9Y[/embed]
