धार्के, धादिङ । धादिङको धुनिबेशी नगरपालिकाले कोरोना संक्रमण नियन्त्रणका लागि नागरिकलाई स्वास्थ्य सुरक्षाका मापदण्ड पालना गर्न आग्रह गरेको छ । पटक–पटक साबुनपानीले हात धुन, मास्क र स्यानिटाइजर प्रयोग गर्न, अनावश्यक भीडभाड नगर्न र अत्यावश्यक कामबाहेक घरबाहिर नगरपालिकाले नगरबासीलाई आग्रह गरेको हो ।
स्वास्थ्य सुरक्षाका मापदण्डको कडाइका साथ पालना गर्नु नै कोरोनाबाट बच्ने उपाय भएकाले नगरबासीले यसमा सहयोग पु¥याउने अपेक्षा गरिएको नगरप्रमुख बालकृष्ण आचार्यले बताएका छन् ।
आचार्यका अनुसार नगरपालिकामा अत्यावश्यक औषधीको व्यवस्थासहित तत्कालका लागि आवश्यक अक्सिजन सिलिन्डरको व्यवस्था गरिएको छ । थप अक्सिजन सिलिन्डर खोजी भइरहेको नगरप्रमुख आचार्यले जानकारी दिए । नगरपालिकाको आफ्नै ३ वटा एम्बुलेन्स मार्फत बिरामीलाई अस्पतालसम्म निःशुल्क ल्याउने व्यवस्था मिलाइएको नगर उपप्रमुख उपप्रमुख निरु खरेलको भनाइ छ ।
अक्सिजन उत्पादनका लागि २ वटा मेसिन र विद्युत् आपूर्ति नभएको समय मेसिन चालू राख्न जेनेरेटर व्यवस्था गरिएको नगरपालिकाका प्रमुख प्रशासकीय अधिकृत हरिदत्त कँडेलले जानकारी दिए । आवश्यक परे नगरप्रमुख, उपप्रमुख तथा प्रमुख प्रशासकीय अधिकृतले चढ्ने गरेको सवारी साधन बिरामीको स्वास्थ्य सेवा दिन तयारी अवस्थामा राखिएको नगरपालिकाले बताएको छ ।
