धादिङ । नेपालमा कोरोना संक्रमणले भयावह रूप लिइरहेका बेला विभिन्न विदेशी मुलुकहरुले नेपाललाई सहयोग गर्ने क्रम बढेको छ । यसैक्रममा बेलायतले नेपाललाई २० लाख कोरोना खोपसहयोग गर्ने भएको छ ।
बेलायतले आफ्नो देशमा विकास गरिएको खोप एस्ट्राजेनेका २० लाख उपलब्ध गराउने भएको हो । नेपालका लागि बेलायती राजदूत निकोला पोलिटले स्वास्थ्यमन्त्री हृदयेश त्रिपाठीलाई भेटेर बेलायतले कोभ्याक्स कार्यक्रमअन्तर्गत नेपाललाई कोरानाविरुद्धको खोप उपलब्ध गराउने जानकारी दिनुभएको हो ।
नेपालमा कोरोनाको स्थिति भयावह बन्दै गइरहेको बारेमा बेलायती संसद्को उपल्लो सदन हाउस अफ लड्र्समा समेत लामो छलफल भएको छ । यसअघि पनि बेलायतको समेत सहयोग रहेको कोभ्यास कार्यक्रमअन्तर्गत नेपालले भारतमा बनेको कोरोनाविरुद्धको खोप कोभिसिल्डको ३ लाख ४८ हजार मात्रा खोप प्राप्त गरिसकेको छ भने अहिले बेलायतले पुनः आफै खोप दिन लागेको हो ।
