धादिङ । धादिङको १३ वटै स्थानीय तहमा निर्वाचन कार्यालय स्थापना गरिएको छ । स्थानीय तह निर्वाचनका लागि जिल्लाको सदरमुकाम धादिङबेशीमा मुख्य निर्वाचन अधिकृतको कार्यालय स्थापना गरिएको हो । मुख्य निर्वाचन अधिकृत समेत रहनुभएका जिल्ला न्यायाधीश रमेश प्रसाद ज्ञवालीले कार्यालय स्थापना गरी निर्वाचनसम्बन्धी कामकाज अगाडि बढेको बताउनु भएको छ ।

निर्वाचन आयोगको कार्यतालिका अनुसार नीलकण्ठ नगरपालिका स्थित धादिङबेशीमा १ मुख्य निर्वाचन अधिकृतको कार्यालय र १२ वटा स्थानीय तहमा निर्वाचन अधिकृतको कार्यालय स्थापना गरिएको हो। धादिङमा ११ गाउँपालिका र २ नगरपालिका रहेका छन्।

धुनीबेसीको निर्वाचन अधिकृत सर्वोच्चका इजलास अधिकृत राजकुमार आचार्य, खनियाबासमा योजना आयोगका उप सचिव गोकुल खड्का, गंगाजमुनामा मालपोत धादिङका प्रमुख रामकृष्ण तामाङ, गजुरीमा प्रधानमन्त्री कार्यालयका उप सचिव चक्रपाणि शर्मा, गल्छीमा समाजिक विकास मन्त्रालयका अधिकृत दिपेन्द्र सुवेदी रहेका छन् ।

त्यसैगरी ज्वालामुखीमा सम्पत्ति सुद्धिकरण विभागमा कार्यरत उप सचिव हिरामणि सुवेदी, थाक्रेमा संघिय मामिला मन्त्रालयमा कार्यरत उप सचिव महेन्द्र प्रसाद साखी, त्रिपुरासुन्दरीमा उपन्यायाधिवक्ता गोपाल लामिछाने, नेत्रावती डवजोङमा उपन्यायाधिवक्ता कला पौडेल , बेनीघाट रोराङमा उपन्यायाधिवक्ता खेमराज पाठक, रुबीभ्यालीमा सर्वोच्चका इजलास अधिकृत भीमप्रसाद सुवेदी र सिद्धलेकमा जिल्ला अदालत धादिङका स्रेस्तेदार खुमप्रसाद भण्डारी निर्वाचन अधिकृतका रुपमा रहेका छन् ।

निर्वाचन आयोगले स्थानीय तह निर्वाचनका लागि बिहीबार देशभरका ७५३ वटै स्थानीय तहमा निर्वाचन कार्यालय स्थापना गरेको छ । आयोगले प्रत्येक निर्वाचन अधिकृतको कार्यालयमा करिब १० जना कर्मचारी रहने व्यवस्था गरेको छ । निर्वाचन आयोगले बैशाख ३० गते हुने स्थानीय तह निर्वाचनका लागि ११ र १२ गते उम्मेदवारी मनोनयन दर्ताको कार्यक्रम राखेको छ ।