धादिङ जिल्लाको सदरमुकाम धादिङबेसीका स्थानीयलाई दुई दिने कौशी खेती तालिम दिइएको छ । घरको छत प्रयोग गरि ताजा तथा स्वस्थकर तरकारी उत्पादन गर्ने उद्देश्यले तालिम तथा आवश्यक सामाग्री प्रदान गरिएको हो ।
नीलकण्ठ नगरपालिका कृषि शाखाको समन्वयमा नीलकण्ठ नगरपालिका वडा नम्बर ३ ले धादिङबेसीका स्थानीयलाई कौशी खेती तालिम दिएको हो । विषादीरहित ताजा तरकारी उत्पादन गर्ने उद्देश्यले तालिम आयोजना गरिएको नीलकण्ठ नगरपालिका– ३ का वडा अध्यक्ष राजकुमार श्रेष्ठले बताए ।
तालिममा वडा नम्बर ३ धादिङबेसीका ४४ जना स्थानीयहरु सहभागी रहेका थिए । तालिममा सहभागीहरुलाई तालिम पश्चात कौशी खेतीका लागि आवश्यक सामाग्रीहरु पनि वितरण गरिएको वडा सदस्य सन्तोष थापाले बताए ।
