धादिङ । माध्यमिक शिक्षा परीक्षा (एसइई) को सम्पूर्ण तयारी पुरा भएको छ। भोलिदेखि सुरु भई २७ गतेसम्म सञ्चालन हुने यस वर्षको एसइई परीक्षामा धादिङमा सामुदायिक र संस्थागत विद्यालय गरी ५ हजार ४ सय ७५ विद्यार्थी सहभागी हुने शिक्षा विकास तथा समन्वय इकाई धादिङका प्रशासकीय प्रमुख भुमीलाल शर्मा सुवेदीले जानकारी दिनुभयो।
सुवेदीका अनुसार धादिङको १ सय ३४ सामुदायिक विद्यालय र २० संस्थागत विद्यालयबाट नियमिततर्फ ४ हजार ३ सय ४७, प्राविधिकतर्फ १ सय ६४, ग्रेड वृद्धितर्फका ९ सय ३२ र खुल्ला तर्फ ३२ जना विद्यार्थी सहभागी हुनेछन्।
जिल्लाभर २४ परीक्षा केन्द्रमा २४ जना केन्द्राध्यक्ष, ४३ जना सहायक केन्द्राध्यक्ष, २ सय ७५ जना निरीक्षक, ५६ जना परीक्षा सहायक,३ सय ६० जना सुरक्षाकर्मी र ११० जना सहयोगी कर्मचारी गरी जिल्लाभर ८ सय ७५ जना जनशक्ती प्रत्यक्ष परिचालन गरिने प्रशासकीय प्रमुख सुवेदीले बताउनुभयो।
परीक्षाका लागि आवश्यक उत्तरपुस्तिका केन्द्रहरूमा पु¥याइसकिएको र प्रश्नपत्रहरू परीक्षा केन्द्र नजिकै रहेका प्रहरी चौकीमा सुरक्षित रूपमा राखिएको बताउनुभयो। परीक्षा स्वच्छ, निष्पक्ष र मर्यादित रूपमा सञ्चालन हुने उहाँको भनाई छ।
यसवर्षको परीक्षामा देशभर पाँच लाख १४ हजार ७१ विद्यार्थी सहभागी हुने राष्ट्रिय परीक्षा बोर्ड, परीक्षा नियन्त्रण कार्यालयले जनाएको छ । परीक्षाका लागि देशभर दुई हजार ७९ परीक्षा केन्द्र निर्धारण गरेको छ। परीक्षा बिहान ८ देखि बिहान ११ बजेसम्म सञ्चालन हुनेछ।
