धार्के,धादिङ। जनकवि केवलपुरे किसानको ९९ औं जन्म जयन्तीको अवसरमा अन्तरक्रिया तथा रचना वाचक कार्यक्रम सम्पन्न भएको छ।
धादिङ थाक्रे गाउँपालिका वडा नं १० को ठुलो पोखरीस्थित केवलपुरे किसान पार्कमा रहेको उहाको सालिकमा माल्यारर्पण सहित अन्तरक्रिया तथा रचना वाचक गरि जन्म जयन्ती मनाइएको धादिङ सिर्जना प्रतिष्ठानकी अध्यक्ष सिर्जना अर्यालले जानकारी दिनु भयो।
थाक्रे गाउँपालिका वडा नं १० र धादिङ सिर्जना प्रतिष्ठानको संयुक्त आयोजनामा आयोजित कार्यक्रममा स्व.देवी प्रसाद पौडेल (केवलपुरे किसान)ले दिनुभएको योगदानबारे चर्चा गरिएको थियो। वि.स.२००६ सालमा जातभात र छुवाछुत बिरुद्व जनै फालेर हलो जोतेका कारण देश निकालासमेत भएका स्व. कवि पौडेलले आफ्नो साहित्यमार्फत अत्याचारको विरुद्ध र किसान, श्रमिक महिलाको पीडामा कलम चलाई समाज परिवर्तनमा ठूलो योगदान पुर्याउनु भएको थियो।
धादिङ सिर्जना प्रतिष्ठानकी अध्यक्ष सिर्जना अर्यालको अध्यक्षतामा सञ्चालन भएको कार्यक्रममा वरिष्ठ साहित्कार नरनाथ लुइँटेलको प्रमुख आतिथ्यता, थाक्रे गाउँपालिकाका प्रमुख प्रशासकीय अधिकृत बम बहादुर केसी, वडा नं १० का वडा अध्यक्ष गोकुल प्रसाद लामिछाने,साहित्यकार, कवि लगायतको सहभागिता रहेको थियो।
