धादिङ । आसन्न फागुन २१ गते हुने प्रतिनिधिसभा सदस्य निर्वाचन अन्तर्गत धादिङ क्षेत्र नम्बर १ मा नेकपा एमालेबाट उम्मेदवारी दिनुभएका भूमि त्रिपाठीलाई मतदाताहरूले भूमिस्थान तथा तसर्पु क्षेत्रलाई विकाससँग जोड्न आग्रह गरेका छन्।
मतदाता भेटघाट कार्यक्रमअन्तर्गत दक्षिणी धादिङको थाक्रे गाउँपालिका वडा नम्बर २, ३ र ४ का विभिन्न बस्तीमा पुगेका त्रिपाठीसँग स्थानीयले नागरिकको आवश्यकता र चाहनाअनुसार विकासका योजना अघि बढाउने तथा त्यसअनुरूप नीति, नियम र कानुन निर्माण गर्न सुझाव दिएका हुन्।
स्थानीयले प्रतिनिधिसभामा नीति–कानुन बनाउन पठाए पनि आफ्नो क्षेत्रको विकास र समृद्धिका लागि ठोस काम गर्नुपर्ने अपेक्षा राखेको बताएका छन्। महादेबेसी–निगाले–आग्रा सडक, महादेबेसी–रातमाटे–चल्ती सडक कालोपत्रे लगायतका योजनालाई प्राथमिकतामा राख्न आग्रह गरिएको छ।
साथै सिंचाइ, खानेपानी, शिक्षा र स्वास्थ्य क्षेत्रमा नागरिकको सहज पहुँच सुनिश्चित हुने गरी नीति बनाउन माग गरिएको छ। मतदाताको माग र सुझावलाई सम्बोधन गर्दै उम्मेदवार त्रिपाठीले नागरिकको आवश्यकता अनुसार नीति–नियम र कानुन निर्माण गर्ने तथा विकास निर्माणका योजनाहरू प्रभावकारी रूपमा अघि बढाउने प्रतिबद्धता व्यक्त गर्नुभएको छ।
बिहीबार महादेबेसी, समनटार, सिम, मिलनचोक, भूमिचुली, डाँडाखार्क, डाँडागाउँ, निगाले, लिति, बाहुनथान र धैरेनीका मतदाताको घरदैलोमा पुगेर त्रिपाठीले जनपक्षीय कानुन निर्माण गर्दै विकासका कार्यक्रममार्फत जनताको पहुँच विस्तार गर्ने प्रतिवद्धता जनाउनुभएको छ।
