धादिङको थाक्रे गाउँपालिका–७, जुंगेखोलास्थित पृथ्वी राजमार्गमा चारवटा सवारीसाधन एकआपसमा ठोक्किँदा तीनजना घाइते भएका छन्। आइतबार काठमाडौंबाट पोखरातर्फ जाँदै गरेको बा.३ ख ८८८८ नम्बरको हायस र विपरीत दिशाबाट आउँदै गरेको बा.४ ख ३९५१ नम्बरको टिपर आपसमा ठोक्किएका थिए। त्यसपछि सोही दिशातर्फ जाँदै गरेको ग.१ ज ३५११ नम्बरको ट्याक्सी र बा.प्र. ०२–०१८ प १८५९ नम्बरको स्कुटर पनि टिपरको पछाडि ठोक्किएका हुन्।
दुर्घटनामा हायसमा सवार तनहुँ आबुँखैरेनी गाउँपालिका–१ का ४७ वर्षीय शिव थापा, धादिङ गजुरी गाउँपालिका–८ का ६५ वर्षीय कुलप्रसाद ढुंगाना र गोरखा नगरपालिका–१३ की ३६ वर्षीया सरस्वती श्रेष्ठ घाइते भएका छन्।
घाइते तीनैजनाको उद्धार गरी धार्केस्थित साइबाबा सामुदायिक अस्पतालमा सामान्य उपचारपछि थप उपचारका लागि काठमाडौंस्थित ट्रमा सेन्टर पठाइएको प्रहरीले जनाएको छ।
