धादिङको धुनिबेशी नगरपालिका–६, धार्के बजारमा बृहत् रक्तदान कार्यक्रम सम्पन्न भएको छ।
राष्ट्रिय स्वतन्त्र पार्टी (रास्वपा) धुनिबेशी नगर समितिको आयोजना तथा जिल्ला समितिको समन्वयमा कार्यक्रम गरिएको हो। रक्तदान कार्यक्रममा १३० जना पुरुष र ५ जना महिला गरी कुल १३५ जनाले रक्तदान गरेका छन्।
अन्तर्राष्ट्रिय युवा दिवसको अवसरमा रास्वपा जिल्ला समिति धादिङले आयोजना गरेको साताव्यापी कार्यक्रमअन्तर्गत धार्केमा रक्तदान कार्यक्रम गरिएको जिल्ला सभापति राजन अर्यालले बताउनुभयो।
कार्यक्रममा रक्तदान जीवन बचाउने महत्वपूर्ण मानवीय कार्य भएको भन्दै अतिथिहरूले यसको महत्वबारे चर्चा गरेका थिए। रक्तदान कार्यक्रममा स्थानीय नागरिक, व्यापारी, बैंक तथा वित्तीय संस्थाका प्रतिनिधि, रास्वपाका नेता तथा शुभेच्छुकहरूको सहभागिता रहेको थियो।
आयोजकका अनुसार कार्यक्रममा संकलित रगत आवश्यक परेका बिरामीको उपचारमा सहयोग पुग्ने अपेक्षा गरिएको छ।
