धादिङको बेनीघाट रोराङ गाउँपालिकाले दोस्रो पञ्चवर्षीय गाउँ शिक्षा योजना निर्माणका लागि भदौ ५ र ६ गते वडा नम्बर १ स्थित ब्रोम्दिङ डाँडामा दोस्रो गाउँ शिक्षा सम्मेलन आयोजना गर्ने भएको छ। सम्मेलनमा आगामी पाँच वर्षको शिक्षा क्षेत्रको योजना, प्राथमिकता र सुधारका विषयमा छलफल गरिनेछ। विद्यालय शिक्षाको गुणस्तर सुधार, विद्यार्थीको सिकाइ उपलब्धि वृद्धि, शिक्षकको क्षमता विकास तथा विद्यालयका भौतिक र शैक्षिक पूर्वाधार सुधारलगायत विषयमा सहभागीबीच सुझाव आदानप्रदान हुनेछ।
गाउँपालिकाका शिक्षा अधिकृत सन्तोष पौडेलका अनुसार शिक्षा योजना निर्माणसँगै ब्रोम्दिङको पर्यटन प्रवर्द्धन गर्ने उद्देश्यले सम्मेलन स्थलका रूपमा ब्रोम्दिङ छनोट गरिएको हो। सम्मेलनमा शिक्षक, विद्यार्थी, अभिभावक, विद्यालय व्यवस्थापन समिति, जनप्रतिनिधि तथा शिक्षा क्षेत्रका सरोकारवालाको सहभागिता रहनेछ।
सम्मेलनबाट प्राप्त सुझाव र निष्कर्षका आधारमा बेनीघाट रोराङ गाउँपालिकाको दोस्रो पञ्चवर्षीय गाउँ शिक्षा योजना निर्माण गरिनेछ।
झण्डै २१ सय मिटर उचाइमा रहेको ब्रोम्दिङबाट गणेश हिमाल र मनास्लुलगायत हिमश्रृङ्खला देख्न सकिन्छ। तामाङ बस्तीको बाहुल्यता रहेको ब्रोम्दिङ स्थानीय परिकार र उत्पादनका साथै प्राकृतिक सौन्दर्यका कारण पर्यटकीय सम्भावना बोकेको क्षेत्र मानिन्छ।
