नेपाली कांग्रेस धुनिवेशी नगर सभापति पदका लागि माधव प्रसाद सिलवालले उम्मेदवारी घोषणा गरेका छन् । पार्टी संगठनलाई व्यक्तिमुखी नभई संस्थागत र प्रणालीमा आधारित बनाउने उहाँको प्रतिबद्धता छ ।
नौ वटै वडालाई व्यवस्थित रूपमा जोड्ने, युवा तथा महिलाको अर्थपूर्ण सहभागिता बढाउने, अग्रजको अनुभव र नयाँ पुस्ताको ऊर्जाबीच समन्वय गर्ने तथा संगठनमा पारदर्शिता र राजनीतिक संस्कारलाई प्राथमिकता दिने उनको घोषणा छ ।
उम्मेदवारी घोषणा गर्दै उनले धुनिवेशी नगरपालिकाका नौ वटै वडाबाट निर्वाचित वडा सभापति, पदाधिकारी, सदस्य तथा क्षेत्रीय प्रतिनिधिलाई बधाई दिँदै सबैको एकता, सहकार्य र जिम्मेवार नेतृत्वबाट पार्टीलाई बलियो बनाउनुपर्ने धारणा राखे ।
उनले संगठनलाई व्यक्तिमुखी नभई प्रणालीमुखी बनाउने, नौवटै वडाको अवस्था नियमित रूपमा बुझ्ने, सदस्यता तथा संगठनको अभिलेख व्यवस्थित गर्ने, कार्यकर्ता विचमा प्रशिक्षण सञ्चालन गर्ने तथा पार्टि निर्णयको कार्यान्वयन र समीक्षा गर्ने संयन्त्र विकास गर्ने प्रस्ताव अघि सारेेका छन् ।
निर्वाचनका बेला मात्र सक्रिय हुने नभई वर्षभरि कार्यकर्ता र नागरिकसँग जोडिएको संगठन निर्माण गर्नुपर्ने उनको धारणा छ ।
युवाको सहभागितालाई आफ्नो उम्मेदवारीको अर्को महत्वपूर्ण एजेन्डाका रूपमा प्रस्तुत गर्दै युवालाई केवल कार्यक्रमको भीडका रूपमा नभई नीति, विचार र नेतृत्व निर्माणको साझेदार बनाउनुपर्ने उहाँको धारणा छ । उनले संविधान, स्थानीय सरकार, बजेट, नीति निर्माण, सञ्चार तथा नेतृत्व विकाससम्बन्धी प्रशिक्षणमार्फत नयाँ पुस्तालाई नेतृत्वका लागि तयार गर्नुपर्नेमा जोड दिए ।
उमेद्वारी घोषणाका क्रममा उहाँले महिलाको सहभागिता निर्णय र नेतृत्व तहमा अर्थपूर्ण बनाउनुपर्ने तथा अग्रज र नयाँ पुस्ताबीच नियमित संवाद आवश्यक रहेको उल्लेख गर्नुभएको छ । पार्टिभित्र मतभिन्नता भए पनि राजनीतिक संस्कार र आर्थिक पारदर्शितालाई समेत प्राथमिकतामा राख्दै आपसी सम्मान कायम राख्नुपर्ने उहाँको धारणा छ । कार्यक्रमअघि योजना, स्रोत र जिम्मेवारी तथा कार्यक्रमपछि अभिलेख र समीक्षा गर्ने प्रणाली विकास गर्नुपर्ने उहाँको प्रस्ताव छ ।
