काठमाडौं । वैज्ञानिकहरूले प्रयोगशालामा कृत्रिम रगत बनाएका छन् र जुनसुकै रक्तसमूहका मानिसलाई दिन मिल्ने दाबी गरेका छन् । जापानी विज्ञहरूको एक टोलीले रातो कोशिकासहितको रगत बनाएका छन् । त्यसमा अक्सिजन र प्लेटेलेट पनि छन् ।
उक्त रगत १० वटा खरायोमा परीक्षण गर्दा ६ वटा बाँचे । जनावरहरूलाई प्राकृतिक रगत नै दिएको भए पनि यस्तै परिणाम आउने वैज्ञानिकहरूले बताएका छन् ।
दुर्घटनास्थलमा तत्काल रगत चाहिएको व्यक्तिलाई यो रगत उपयोगी हुने वैज्ञानिकहरू बताउँछन् । रगत चढाउनुअघि रोगीहरूलाई चिकित्सकले रक्तसमूह पहिचान गरेर दिने गरेका छन् । केही एयरएम्बुलेन्सहरूले ओ नेगेटिभ रगत राख्ने गरेका छन् किनकि त्यो युनिभर्सल टाइप मानिन्छ र आकस्मिक पर्दा सबैलाई दिन सकिन्छ । तर यो एकदमै दुर्लभ रक्तसमूह हो ।
कृत्रिम रगत तोकोरोजावा शहरमा रहेको नेसनल डिफेन्स मेडिकल कलेजका वैज्ञानिकहरूले तयार पारेका हुन् । उनीहरूले ट्रान्फ्युजन जर्नलमा यसको बारेमा लेखेका छन् । - एजेन्सी
२०७६ असोज १६ गते प्रकाशित
