काठमाडौं । सत्तारुढ दल नेपाल कम्युनिष्ट पार्टी ९नेकपा० का कार्यकारी अध्यक्ष पुष्पकमल दाहाल प्रचण्डले नेकपाभित्रको विवाद पदका लागि नभएको बताएका छन् । आज शनिबार कम्युनिष्ट नेता तुलसीलाल अमात्यको २३ औँ स्मृति दिवसका अवसरमा आयोजित कार्यक्रममा बोल्दै अध्यक्ष प्रचण्डले सो कुरा बताएका हुन् ।
नेकपाभित्र पछिल्लो समय विवाद चर्किको छ । प्रधानमन्त्री केपी शर्मा ओलीले सत्ता र पार्टी प्रभावकारी रुपमा चलाउन नसकेकाले तत्काल राजीनामा दिनुुपर्ने माग गरिएको हो । यहि व्याख्यालाई चिर्न अध्यक्ष दाहालले पार्टीभित्र चलेको बहस पद प्राप्तिका लागि नभएको दाबी गरेका हुन् । त्यस्तै अध्यक्ष दाहालले पार्टीभित्रको बहसलाई अस्वस्थ बनाइएकाले बाहिर नकारात्मक प्रभाव परेको पनि बताए ।
आफूले पार्टी एकता गर्नुपूर्व नै राष्ट्रका लागि भनेर पद त्याग गरेर अगाडि बढेको बताउँदै दाहालले नेकपाले अहिले स्थायित्व दिनुपर्ने बेला आएको बताए । आफ्नो ध्यान पद भन्दा पनि राष्ट्रको सेवातर्फ लक्षित भएको उनको भनाइ छ । पार्टीलाई विचार र विधिबाट चलाउनुपर्ने भनेर अहिले बहस भइरहेको दाहालले बताए । उनले पार्टी एकताको रक्षा गर्नका लागि नेताहरू बहसमा निरन्तर लागि रहनुपर्नेमा पनि जोड दिए । पार्टी एकताका नाममा मुलुकका विभिन्न मुद्दा र पार्टीको विचारबारे बहस गर्नै हुन्न भन्ने मान्यता राख्न नहुने उनको भनाइ छ ।
दाहालले पार्टी एकताको तीन वर्षमै विभाजन हुने हो कि भन्ने चिन्ता पैदा भएको भन्दै पद दिएर कम्युनिष्टसँग एकता हुन नदिनेहरूसँग विगतमा आफू लड्दै आएको पनि प्रचण्डको दावी छ । कम्युनिष्ट पार्टी विचार र पद्धतिमा चल्ने भएकोले कहिलेकाँही पार्टीभित्र हुने चर्को बहस पनि स्वभाविक हुने उनको भनाइ छ ।
