धादिङ । धादिङमा थप ३ जनामा कोरोना भाइरस संक्रमण पुष्टि भएको छ । आज बुधबार पाटन अस्पताल ललितपुर र नेपाल कोरीया मैत्री अस्पतालमा गरिएको पीसिआर परिक्षणमा ३ जनामा कोरोना पुष्टि भएको स्वास्थ्य कार्यालय धादिङका हेल्थ असिस्टेन्ट मिलन रिजालले जानकारी दिनुभयो । आज पुष्टि हुनेमा ज्वालामुखी गाउँपालिका–६ का १ जना र धादिङ घर भई अन्य ठेगाना नखुलेका २ जना रहेका छन् । यो सँगै धादिङमा कोरोना संक्रमितको संख्या १ सय ४० पुगेको छ ।
हालसम्म धादिङको १३ स्थानिय तहमध्ये १२ वटा स्थानिय तहमा कोरोना संक्रमित भेटिएका छन् । जसमा नीलकण्ठ नगरपालिकामा ६६ जना, ज्वालामुखी गाउँपालिकामा ३० जना, त्रिपुरासुन्दरीमा २१ जना रहेका छन् । यस्तै सिद्धलेकमा ४ जना, नेत्रावती डब्जोङका २ पुरुष, बेनिघाट रोराङका २ जना, गल्छीमा ३ जना, थाँक्रेमा ३ जना, धुनीबेसी नगरपालिकामा १, गजुरीमा ३ जना र खनियाबास गाउँपालिकामा ३ जना र ठेगाना नखुलेको २ गरी संक्रमितको संङ्ख्या १ सय ४० पुगेको रिजालले जानकारी दिनुभयो । यसैगरी जिल्लाका १ सय ३० जना कोरोना संक्रमित निको भएर घर फर्केका छन्।
