धादिङ । धादिङमा आज थप ६ जनामा कोरोना भाइरस संक्रमण पुष्टि भएको छ । आज धादिङको त्रिपुरासुन्दरी गाउँपालिका–४ का ७७ वर्षिय पुरुष,गल्छि–४ का २६ वर्षिय पुरुष, धुनीबेशी–३ का ७८ र २९ वर्षिय पुरुष र धादिङ घर भएका तर अन्य ठेगाना नखुलेका ३३ र ३४ वर्षिय पुरुषमा संक्रमण पुष्टि भएको स्वास्थ्य कार्यालय धादिङका हेल्थ असिस्टेन्ट मिलन रिजालले बताउनुभयो । यो सँगै धादिङमा जम्मा संक्रमितको संख्या १ सय ६३ पुगेको छ ।
जिल्लाको १३ वटै स्थानीय तहमा कोरोना संक्रमित भेटिएका छन् । जसमा नीलकण्ठ नगरपालिकामा ७३ जना,ज्वालामुखी गाउँपालिकामा ३३ जना, त्रिपुरासुन्दरीमा २२ जना रहेका छन् । यस्तै सिद्धलेकमा ४, नेत्रावती डबजोङमा ४, बेनिघाट रोराङका २, गल्छीमा ५, थाँक्रेमा ३, धुनीबेसी नगरपालिकामा ६, गजुरीमा ४, खनियाबासका ३,रुविभ्यालीका १,गंगाजमुना १ जना र धादिङ घर भएका तर अन्य ठेगाना नखुलेका २ गरी १ सय ६३ जना रहेको हेल्थ असिस्टेन्ट रिजालले बताउनुभयो ।
जम्मा संक्रमित मध्ये १ सय २६ जनाको धादिङमा स्वाव संकलन गरि परिक्षणको लागि पठाईएको र बाँकी ३७ जनाको भने जिल्ला बाहिर गएर स्वाव परिक्षण गराउँदा पोजेटिभ देखिएको स्वास्थ्य कार्यालय धादिङले जनाएको छ । अहिले जिल्ला भित्रको आइसोलेसनमा १६ जना र जिल्ला बाहिर ११ जना रहेका छन् भने क्वारेन्टिनमा ४१ जना रहेका छन् । धादिङमा कोरोना संक्रमणबाट एक जनाको मृत्यु भएको छ ।
