काठमाण्डौं । नेपालमा पीसीआर परीक्षण आठ हजारमा झरेको छ। आइतबार आठ हजार २६ जनाको मात्रै पीसीआर परीक्षण भएको छ। स्वास्थ्य तथा जनसंख्या मन्त्रालयले चार वटा प्रयोगशालाको रिपोर्टमा प्राविधिक समस्या देखिएकाले कोरोना नतिजा सार्वजनिक नगरिएको जनाएको छ।
नियमित पत्रकार सम्मेलनमा प्रवक्ता जागेश्वर गौतमले भरतपुर चितवन, हेटौडा, त्रिवि शिक्षण अस्पताल काठमाडौं र विरेन्द्र सैनिक अस्पतालको पीसीआर रिपोर्ट सार्वजनिक नगरिएको बताए। तर, संक्रमण भने शनिबार भन्दा बढी देखिएको छ।
शनिबार भन्दा पाँच हजार कम परीक्षण गर्दा झण्डै दुई सय बढीमा संक्रमण पुष्टि भएको छ। काठमाडौं उपत्यकामा मात्रै १६६ जनामा संक्रमण पुष्टि भएको छ। त्यस मध्ये काठमाडौंका मात्रै १२६ जना छन्। पर्सामा १३९, सर्लाहीमा ९१ र मोरङमा ५० जनामा संक्रमण पुष्टि भएको छ। उपत्यकाका भक्तपुरमा २८ र ललितपुरमा १२ जनामा संक्रमण पुष्टि भएको छ।
आइतबार देशभर गरी ८१८ जनामा संक्रमण पुष्टि भएको छ। थपिएका संक्रमितमा ५९८ पुरष र २२० महिला छन्। नेपालमा संक्रमित संख्या ३१ हजार ९३५ पुगेको छ।
बितेको २४ घण्टामा २८१ जना डिस्चार्ज भएका छन्। यो सहित संक्रमित निको हुनेको संख्या १८ हजार ६३१ जना पुगेको छ।
आइतबार थप तीन जनाको मृत्यु भएको छ। यो सहित संक्रमणबाट मृत्यु हुनेको संख्या १४९ पुगेको छ। सक्रिय संक्रमित संख्या भने १३ हजार १५५ पुगेको छ। त्यसमध्ये ९ हजार २१२ संस्थागत र तीन हजार ९४३ जना होम आइसोलेसनमा छन्।
