काठमाडौं। कोरोना संक्रमणका कारण बितेको २४ घण्टामा ७ जनाको मृत्यु भएको छ । स्वास्थ्य तथा जनसंख्या मन्त्रालयका प्रवक्ता डा.जागेश्वर गौतमले सोमबार मन्त्रालयको नियमित पत्रकार सम्मेलनमा यो जानकारी दिएका हुन् ।
योसँगै नेपालमा कोरोना संक्रमणबाट मृत्यु हुनेको संख्या २२८ पुगेको छ । सोमबारसम्म कोरोनाबाट निको हुनेको संख्या २१ हजार ४१० पुगेको छ भने १७ हजार ८२२ जना संक्रमित रहेका छन् । सोमबार ५८८ जना निको हुँदा ८९९ जना संक्रमित थपिएका छन् ।
सोमबार मृत्यू हुनेमा महोत्तरीकी ४ वर्षीया बालिकासहित गोर्खाकी ६५ वर्षीया र रुपन्देहीको ६८ वर्षीया महिला रहेका छन् । त्यस्तै झापाका ८६ वर्षीय, रौतहटका ४० वर्षीय, चितवनका ७८ वर्षीय, भक्तपुरका ७७ वर्षीय ४ जना पुरुष रहेका छन् । नेपालमा पहिलोपटक गत जेठ ३ गते धुलिखेल अस्पतालमा कोरोना संक्रमित सुत्केरीको मृत्यु भएको थियो ।
