चितवन । चितवन निकुञ्जमा फेरि पनि दुर्लभ एकसिंगै गैंडा मृत भेटिएको छ । निकुञ्जको पश्चिम क्षेत्रमा सोमबार दिउँसो एउटा भाले गैंडा मृत भेटिएको हो । उक्त गैंडा लगभग एक महिनाअघि नै मरेको हुन सक्ने निकुञ्ज कार्यालयका अधिकारीहरूले बताएका छन् ।
निकुञ्जको पश्चिम सेक्टरअन्तर्गत नवलपुरको विनयी–त्रिवेणी गाउँपालिकाको भेलौंजी कठौंनामा अन्दाजी ३०र३५ वर्षको गैंडा मृत भेटिएको निकुञ्जका सूचना अधिकारी अशोक रामले जानकारी दिए । गैंडा कुहिएको अवस्थामा भेटिएको थियो । ‘अर्को भालेसँग जुधेर करिब एक महिनाअगाडि गैंडा मरेको हुन सक्छ,’ रामले भने, ‘खाग–खुर सुरक्षित रहेका कारण दुर्घटनावश नै मरेको हुनुपर्छ ।’
यससँगै साउनयता निकुञ्जमा नौ गैंडा मरिसकेका छन् । असोजमा मात्रै ६ वटा गैंडा मृत फेला परेका छन् । चितवन निकुञ्जमा आर्थिक वर्ष ०७५र७६ मा निकुञ्ज इतिहासकै सर्वाधिक ४३ वटा गैंडा मरेका थिए । अहिले पनि त्यसै गरी मर्न थालेपछि संरक्षणकर्मी चिन्तित छन् ।
