काठमाण्डौं । प्रधानमन्त्री केपी शर्मा ओलीले हिमाल आरोहण गर्न जाँदा सरकारलाई जानकारी गराए सहयोग गर्ने आश्वासन दिएका छन् । विश्वको दोस्रो अग्लो हिमाल माउन्ट केटूको कीर्तिमानी आरोहण गरेर मंगलबार स्वदेश फिर्ता भएका निर्मल पूर्जालगायत १० नेपाली आरोहीलाई बधाई दिँदै प्रधानमन्त्री ओलीले आगामी दिनमा औपचारिक जानकारी गराएर हिमाल आरोहण गरेमा सरकारले गच्छे अनुसार सहयोग गर्ने प्रतिबद्धता व्यक्त गरेका हुन् । उनले माउन्ट केटूको सफलतापूर्वक आरोहण गरेर देशको परिचय र गौरवलाई अझ माथि उठाएको बताए ।
प्रधानमन्त्री ओलीले आगामी दिनमा हिमालको आरोहण गर्ने आरोहीहरुलाई सरकारको तर्फबाट अवार्ड दिने पनि बताए । संस्कृति, पर्यटन तथा नागरिक उड्ययनमन्त्री भानुभक्त ढकालले साहसिक युवाहरुको साहसिक कदमका आगामी दिनमा राज्य बेखबर नहुने बताए । वर्तमान सँगै पछिल्लो पुस्तालाई संरक्षण गर्नमा राज्यको ध्यान जाने उनको भनाइ थियो ।
