धादिङ । प्रतिनिधिसभा विघटनविरुद्ध सर्वोच्च अदालतमा दायर रिटमा आज १३ बिहीबारबाट सुनुवाइ हुँदैछ। प्रधानमन्त्रीको सिफारिसमा राष्ट्रपतिले ७ जेठ मध्यराति प्रतिनिधिसभा विघटन परेपछि दायर ३० मध्ये १९ रिटमा बिहीबारबाट सुनुवाइ हुने भएको हो। संवैधानिक इजलाशमा दर्ता भएका ११ रिटमा भने शुक्रबार पेश गरिनेछ।
विपक्षी पाँच दलको गठबन्धनले पनि संयुक्त रिट दायर गरेको छ। उनीहरुले प्रस्ट बहुमतसहित शेरबहादुर देउवालाई प्रधानमन्त्रीमा नियुक्त गर्न माग गरे पनि राष्ट्रपतिले दाबी नपुगेको भन्दै अस्वीकृत गरेकी थिइन्।
त्यसलगत्तै ७६(३) को कामचलाउ हैसियतमा रहेका प्रधानमन्त्री केपी ओलीको सिफारिसमा राष्ट्रपतिले संसद विघटन गरेकी थिइन्। यसअघि गत पुस ५ मा पनि सरकारको सिफारिसमा उनले संसद् विघटन गरेकी थिइन्। तर सर्वोच्च अदालतले फागुन ११ गते संसद पुनर्स्थापनाको फैसला गरेको थियो।
