धादिङ । लगातारको वर्षाका कारण पहिरोले बन्द पृथ्वी राजमार्ग अन्तर्गतको नौविसे –मुग्लिन सडकखण्ड बिहानदेखि खुलेको छ । कुरिनटार, घोप्टेभीरमा खसेको पहिरो हटाएपछि पोखरा–तनहुँ हुँदै काठमाण्डौ आउने जाने गाडी चलेको चितवनको मुग्लिन प्रहरी कार्यालयले जानकारी दिएको छ ।
यस्तै मुग्लिङ–नारायणगढ सहित विभिन्न सडक बन्द भएका छन् । मुग्लिङ–नारायणगढ सडकमा हिजो पहिरो हटाएको आधा घण्टामै फेरि पहिरो खसेपछि अहिलेसम्म सडक खुल्न नसकेको प्रहरी उपरीक्षक अधिकारीले जानकारी दिनुभएको छ । तीन किलो, चार किलो र सेतीदोभानमा पहिरो खसेको छ । सकेसम्म छिट्टै खुलाउने गरी आज बिहानैदेखि पहिरो हटाउन लागिपरेको पनि उहाँले जानकारी दिनुभयो ।
यस्तै त्रिभुवन राजपथ अन्तर्गत नौविसे-हेटौंडा सडक खण्डको भीमफेदी गाउँपालिका वडा नम्बर–९ अघोर, थाहा नगरपालिका वडा नम्बर–१ खानीगाउँ र वडा नम्बर–१२ गैरीगाउँमा सडक बन्द रहेको जिल्ला प्रहरी कार्यालय मकवानपुरले जनाएको छ ।
