बंगालको खाडीमा फेरि अर्को मौसमी प्रणाली विकास भएको छ । त्यो हाल न्यूनचापीय क्षेत्रका रूपमा रहेको भारत मौसम विज्ञान विभागले जनाएको छ । उक्त प्रणाली पश्चिम–उत्तरपश्चिम दिशातिर अघि बढ्ने र आज मध्याह्नसम्ममा दक्षिण–पश्चिम तथा त्यससँग जोडिएको दक्षिण–पूर्वी बंगालको खाडीमा गहिरो न्यूनचापीय क्षेत्रमा परिणत हुने सम्भावना छ । त्यसपछि बिस्तारै त्यो भोलि पश्चिम–मध्य बंगालको खाडीमा शक्तिशाली चक्रवाती आँधीमा विकसित हुने प्रबल सम्भावना रहेको भारतको मौसम विभागले जनाएको छ ।
मंगलबार त्यो प्रणाली शक्तिशाली चक्रवाती आँधीका रूपमा दक्षिण आन्ध्र प्रदेशको तट पार गर्ने प्रबल सम्भावना छ । त्यसको प्रभावले भारतका केही क्षेत्रमा फेरि वर्षा हुन सक्ने त्रिभुवन विश्वविद्यालयको जल तथा मौसम विज्ञान केन्द्रीय विभागका सहप्राध्यापक डा. विनोद पोखरेलले बताएका छन् ।
तर, त्यो प्रणाली नेपालतर्फ आउने वा त्यसको प्रभावले यहाँ वर्षा हुने सम्भावना नदेखिएको उनले स्पष्ट पारेका छन् ।
