धादिङको गल्छी गाउँपालिका–६ बैरेनी अस्पतालमा आज (सोमबार) बृहत् निःशुल्क स्वास्थ्य शिविर सञ्चालन हुँदैछ। मलेसियाबाट आएका अनुभवी चिकित्सकसहितको टोलीले स्वास्थ्य परीक्षण तथा उपचार सेवा प्रदान गर्ने उद्देश्यले शिविर आयोजना गर्न लागिएको हो।
शिविरमा सामान्य स्वास्थ्य परीक्षण तथा उपचार, दुखाइसम्बन्धी समस्या, दाँत तथा मुख स्वास्थ्य परीक्षण, आँखाको परीक्षण, बालबालिका तथा महिलासम्बन्धी रोगको जाँच, रक्तचाप र मधुमेह परीक्षणलगायतका सेवा उपलब्ध हुने आयोजकले जनाएको छ।
त्यस्तै, शिविरमा भिडियो एक्स–रे सेवा तथा आवश्यकताअनुसार निःशुल्क औषधिसमेत वितरण गरिनेछ।
बोधिसत्व विहार, टेगार गुम्बा च्यारिटी र गल्छी गाउँपालिकाको आयोजना तथा कान्छीमाया तामाङ फाउन्डेसनको सहकार्यमा सञ्चालन हुने शिविरमा स्वास्थ्य परीक्षण तथा उपचारको अवसर लिन गल्छी र आसपासका क्षेत्रका सर्वसाधारणलाई आयोजकले सहभागी हुन आग्रह गरेको छ।
