धादिङ । यातायात व्यवसायीले मनपरि भाडा असुल्दा उपभोक्ता मारमा परेका छन् । धादिङबेँसी-टारीबेँसीसम्मको यात्रुले रु २०० भाडा तिर्ने गरेका छन् । महँगो भाडा घटाउन माग गर्दा यात्रुले उल्टै हप्काइ खानुपरेको छ ।
धेरै पटक भाडा बढी भयो भनेर गुनासो गर्दा बसबाट निकालेको ज्यामरुङकी यमकुमारी इटनीले सुनाए । नागरिक समाजका प्रतिनिधिले यातायात क्षेत्रको बेथिति अन्त्य गर्न जिल्ला प्रशासन कार्यालयसँग माग गर्दै आएका छन् । धादिङबेँसीस्थित विभिन्न यातायात समितिले अपाङ्गता भएका, ज्येष्ठ नागरिक र विद्यार्थीलाई सहुलियत नदिएको यात्रुको गुनासो छ ।
यातायात व्यवसायी एवंम् चालक-सहचालकले सहुलियतको टिकट सकिएको जवाफ दिने गरेका छन् । “भाडा असुल्न पन्छाउने गरेको पाइएको छ” अधिकारकर्मी राजु रेग्मी बताउछन् । प्रति व्यक्ति रु १८५ भाडादर भएको काठमाडौँका लागि अपाङ्गता भएका यात्रुबाट रु १५० लिने गरेको पाइन्छ । एउटा बसमा एउटा यात्रुलाई छुट दिएपछि अरुलाई नदिने नियम उनीहरुले बनाएका छन् ।
कालोपत्रे गरिएको सडकको भाडादर घटाउन आग्रह गर्दा यात्रुलाई दुर्व्यवहार गर्ने गरिएको छ । विसं २०७६ असार १ देखि लागु हुने गरी २०७६ जेठ ३० गते यातायात व्यवस्था विभागले कोलोपत्रे सडकमा प्रतिकिलोमिटर दुई रुपैयाँ ५१ पैसा भाडादर निर्धारण गरिएको थियो । धादिङबेँसीदेखि टारीबेँसीसम्म प्रतिकिलोमिटर रु सात रुपैयाँ ५० पैसा भाडा लिने गरेको यात्रुको गुनासो छ । रासस
२०७६ साउन २९ गते प्रकाशित
