धादिङ । बागमती प्रदेश प्रहरी कार्यालय मातहतमा रहेका प्रहरी कर्मचारीहरु सबैले संक्रमण जोखिमलाई कम गर्न भदौ १ गतेदेखि फेस सिल्ड लगाएर ड्युटी गर्ने व्यवस्था मिलाइएको छ ।
बागमती प्रदेश प्रहरी कार्यालय हेटौंडाले कार्यरत सबै प्रहरी कर्मचारीहरुलाई फेस सिल्ड वितरण गरिसकेको बागमती प्रदेश प्रहरीका प्रवक्ता तथा एसएसपी सुदीप गिरीले रातोपाटीलाई जानकारी दिए ।
एसएसपी गिरीले भने, ‘सबै प्रहरी कर्मचारीहरुमा एकरुपता ल्याउन फेस सिल्डमा प्रहरीको लोगो र ‘बागमती प्रदेश प्रहरी’ लेखिएको छ । फिल्डमा नियमित खटिने हरेक प्रहरी कर्मचारीले अब फेस सिल्ड लगाएर ड्युटी गर्छन् ।’
ड्युटीमा खटिने प्रहरी कर्मचारी धेरै जनतासँग सम्पर्कमा हुने भएकाले प्रहरी कर्मचारीलाई संक्रमणबाट जोगाउन र प्रहरी कर्मचारीहरुबाट अन्य व्यक्तिमा संक्रमण नफैलियोस् भन्ने उद्देश्यले फेस सिल्ड उपलब्ध गराइएको एसएसपी गिरीले बताएका छन ।
