यो वर्ष दसैँतिहारलगायत चाडपर्वका निम्ति अग्रिम टिकट बुकिङ नखोलिने भएको छ । मंगलबार काठमाडौंको मीनभवनस्थित यातायात व्यवस्था विभागको कार्यालयमा बसेको सम्बद्ध सबै पक्षको बैठकबाट यात्रु जिल्लातर्फ जाने क्रम सुरु भइसकेकाले दसैँका निम्ति अग्रिम टिकट खुला गर्न आवश्यक नभएको निष्कर्ष निकालिएको हो ।
‘जेनजी’को आन्दोलनपछि विश्वविद्यालय, कलेजहरू बिदा गरिँदा उनीहरू घर जाने क्रम सुरु भइसकेकाले दसैँलक्षित अग्रिम टिकट बुकिङको व्यवस्था नगर्ने निर्णय गरिएको नेपाल यातायात व्यवसायी राष्ट्रिय महासंघका अध्यक्ष विजयबहादुर स्वाँरले जानकारी दिए । दसैँका निम्ति घर जानेलाई तीन–चार दिनअगाडि नै बसको टिकट लिने व्यवस्था मिलाइएको उनले बताए ।
यातायात व्यवस्था विभागका महानिर्देशक राजीव पोखरेलले चाडपर्वमा यात्रुलाई सहज ढंगले गन्तव्यमा पुर्याउने गरी सम्बद्ध सबै पक्षसँग छलफल गरिएको बताए । उनले यात्रुलाई सहज रूपमा गन्तव्यमा पुर्याउने विषयमा कुनै कमी हुन नदिने पनि बताए ।
बैठकमा जिल्ला प्रहरी परिसर काठमाडौंका एसएसपी वसन्त रजौरेले दसैँमा यात्रुलाई ठग्नेमाथि कारबाही हुने चेतावनी दिएका छन् ।
