प्रधानमन्त्री बालेन्द्र शाहले रसुवाको भोटेकोशी नदीमा आएको भीषण बाढीबाट भएको जनधनको क्षतिप्रति दुःख व्यक्त गर्दै उद्धार, खोज तथा राहत कार्यलाई प्रभावकारी बनाउन सरकारको सम्पूर्ण संयन्त्र परिचालन गरिएको बताउनुभएको छ।
देशवासीका नाममा सामाजिक सञ्जालमार्फत सन्देश जारी गर्दै प्रधानमन्त्री शाहले बाढीबाट ज्यान गुमाउनेप्रति श्रद्धाञ्जली तथा शोक सन्तप्त परिवारजनमा समवेदना व्यक्त गर्नुभएको छ। उहाँले घाइतेको शीघ्र स्वास्थ्यलाभको कामना गर्दै प्रभावित नागरिकलाई राज्यका तर्फबाट आवश्यक सबै सहयोग उपलब्ध गराइने प्रतिबद्धता व्यक्त गर्नुभएको छ।
प्रधानमन्त्री शाहका अनुसार बाढीपछि राष्ट्रिय विपद् जोखिम न्यूनीकरण तथा व्यवस्थापन प्राधिकरणको आकस्मिक बैठक, राष्ट्रिय परिषद्को बैठक तथा मन्त्रिपरिषद्को बैठक बसेर उद्धार, खोज तथा राहत कार्यलाई तीव्र बनाउने निर्णय गरिएको छ।
उद्धार तथा खोजीका लागि नेपाली सेना, सशस्त्र प्रहरी बल र नेपाल प्रहरीका टोली प्रभावित क्षेत्रमा परिचालन गरिएको उहाँले बताउनुभएको छ। नेपाली सेनाका हेलिकप्टरमार्फत ठुलो संख्यामा नागरिकको हवाई उद्धार गरिएको तथा घाइतेलाई काठमाडौँ ल्याएर उपचारको व्यवस्था मिलाइएको सन्देशमा उल्लेख छ।
घाइतेको सहज र निःशुल्क उपचारका लागि काठमाडौँका प्रमुख अस्पताललाई तयारी अवस्थामा राखिएको जनाउँदै प्रधानमन्त्री शाहले प्रभावित क्षेत्रमा चिकित्सक तथा स्वास्थ्यकर्मीको टोली, एम्बुलेन्स र आवश्यक स्वास्थ्य सामग्री परिचालन गरिएको बताउनुभएको छ । नेपाल स्काउट, नेपाल रेडक्रस सोसाइटी लगायतका संस्थासँग समेत उद्धार तथा स्वास्थ्य सेवामा समन्वय भइरहेको उहाँले उल्लेख गर्नुभएको छ।
प्रधानमन्त्री शाहले बाढीबाट प्रभावित नागरिकको जीवन रक्षा, बेपत्ताको खोजी, घाइतेको उपचार तथा विस्थापितलाई राहत उपलब्ध गराउनु सरकारको पहिलो प्राथमिकता रहेको बताउनुभएको छ । बेपत्ता नागरिकको खोजी कार्यलाई अझ तीव्र बनाउने तथा बाढीबाट भएको क्षतिको विस्तृत विवरण सङ्कलन गरिने उहाँले बताउनुभएको छ।
नुवाकोटको विदुर, रसुवाको उत्तरगया र गोसाइँकुण्ड, धादिङका विभिन्न स्थानीय तह तथा गोरखाका केही गाउँपालिका बाढीबाट बढी प्रभावित भएको उल्लेख गर्दै प्रधानमन्त्री शाहले ती क्षेत्रमा खाद्यन्न, स्वच्छ खानेपानी, औषधी तथा अस्थायी बसोबासको व्यवस्था तत्काल मिलाइने बताउनुभएको छ।
बाढीबाट क्षतिग्रस्त सडक, पुल, विद्युत् तथा खानेपानीका संरचनाको पुनर्निर्माणलाई प्राथमिकता दिइने र विस्थापित परिवारलाई सुरक्षित स्थानमा पुनःस्थापना गरिने उहाँले बताउनुभएको छ।
