मुग्लिन–नागढुंगा सडक आयोजनाअन्तर्गत पश्चिम खण्ड (मुग्लिन–मलेखु) स्तरोन्नतिको कामले तीव्रता पाएको छ । मौसममा सुधार आएसँगै रोकिएका तथा सुस्त बनेका निर्माण कार्यहरू पुनः धमाधम अघि बढेका हुन् ।
कुल ३८.८६ किलोमिटर लम्बाइ रहेको यो रणनीतिक सडक खण्ड विश्व बैंकको ४ अर्ब ८० करोड ५९ लाख रुपैयाँ बराबरको सहुलियतपूर्ण ऋण सहयोगमा विस्तार तथा स्तरोन्नति भइरहेको हो ।
तीन वर्षभित्र निर्माण कार्य सम्पन्न गर्ने लक्ष्यसहित यो सडक खण्डको ठेक्का २०७९ साल पुस १५ गते सम्झौता भएको थियो । सम्झौता अवधिअनुसार काम अघि बढे पनि हालसम्म यस खण्डको करिब ५५ प्रतिशत मात्र भौतिक प्रगति हासिल भएको छ ।
वर्षायाम सकिएर मौसम अनुकूल भएसँगै निर्माण व्यवसायीले कामलाई गति दिएका छन् । सडक चौडा गर्ने, पर्खाल लगाउने, नाली निर्माण तथा कटिङका कामहरू अहिले तीव्र गतिमा भइरहेका छन् ।
