देशका केही सानाठूला नदीमा अबका दुई दिन पानीको बहाव उल्लेख्य बढ्ने पूर्वानुमान छ । नदीनाला आसपास सतर्कता अपनाउन बाढी पूर्वानुमान महाशाखाले आग्रह गरेको छ । बंगालको खाडीमा विकसित ‘अर्नब’ चक्रवातको ‘अवशेष’को प्रभावले देशमा वर्षा र हिमपात जारी छ । शनिबार सम्म वर्षा र हिमपातको सम्भावना छ । सोही कारण खोलानदीमा बहाव उल्लेख्य बढ्ने महाशाखाको पूर्वानुमान छ ।
हालको आकलनानुसार प्रमुख नदीहरूमा जलसतह सतर्कता तहभन्दा माथि पुग्ने सम्भावना न्यून छ । कोसी तथा नारायणी जलाधारका उच्च हिमाली क्षेत्रमा हिमपात, हिमपहिरोजन्य जोखिमको सम्भावना रहने देखिएको महाशाखाले जनाएको छ ।
