धादिङ जिल्लामा बाढी तथा विपद्का कारण क्षतिग्रस्त सडक तथा पुलहरूको पुनर्निर्माण र सडक पूर्वाधार स्तरोन्नति गर्ने विषयमा महत्त्वपूर्ण सहमति भएको छ। सांसद बोध नारायण श्रेष्ठले सामाजिक सञ्जाल फेसबुक मार्फत यस्तो जानाकारी दिनुभएको हो । अर्थमन्त्री डा. स्वर्णिम वाग्ले, भौतिक पूर्वाधार विकास तथा यातयात मन्त्री सुनील लम्साल तथा सम्बन्धित पक्षबीच भएको बैठकमा धादिङका विभिन्न सडक तथा पुल आयोजनालाई प्राथमिकताका साथ अघि बढाउने सहमति भएको सांसद श्रेष्ठको भनाई छ।
बैठकमा फुर्के खोला पुललाई आधुनिक प्रविधियुक्त पक्की सिग्नेचर ब्रिजका रूपमा निर्माण गर्ने र त्यसका लागि तत्काल बोलपत्र प्रक्रिया सुरु गर्ने निर्णय भएको सांसद श्रेष्ठले बताउनुभएको छ। त्यस्तै, घाटबेँसी पुल निर्माणको काम नेपाल सरकारअन्तर्गतको पूर्वाधार विकास कम्पनीमार्फत तत्काल प्रारम्भ गर्ने सहमति भएको छ।
यसैगरी, मास्टर–पिपलटार–परेवाटार सडकको स्तरोन्नति तथा कालोपत्रे गर्ने, गल्छी–फोस्रेटार–सुनौला बजार–धादिङबेँसी सडक स्तरोन्नति गर्ने र फोस्रेटार–कोशी खोला–खाल्टे सडक सुधार गर्ने सहमति भएको छ।
त्यस्तै, धादिङबेँसी–साङ्कोष–तिप्लिङ सडक तथा ज्वालामुखी–बुङ्कोटघाट–बेनीघाट सडकको समेत स्तरोन्नति गरिने भएको छ। यी आयोजनाहरू कार्यान्वयन गर्न आवश्यक बजेट, कार्यप्रक्रिया र समयसीमाबारे थप विवरण यथाशीघ्र सार्वजनिक गरिने बताईएको छ।
