हेटौंडा । बागमती प्रदेशको मुख्यमन्त्रीमा नेकपा एमालेका सांसद किरण थापा मगरलाई अघि बढाउने निर्णय भएको छ।
एमाले बागमती प्रदेश संसदीय दलको बैठकले थापालाई मुख्यमन्त्री बनाउने औपचारिक निर्णय गरेको हो। प्रदेश प्रमुख दीपकप्रसाद देवकोटाले भदौ ४ गतेसम्म दुई वा दुईभन्दा बढी दलको समर्थनमा बहुमत जुटाएर मुख्यमन्त्रीमा दाबी पेस गर्न आह्वान गर्नुभएको छ।
एमाले र नेकपा मात्रको समर्थनले बहुमत नपुग्ने भएकाले थप दलको समर्थन आवश्यक देखिएको छ। विशेषगरी राष्ट्रिय प्रजातन्त्र पार्टी राप्रपाको समर्थन जुटाउनु निर्णायक बनेको छ।
सरकार गठनका लागि आवश्यक अंकगणित मिलाउन एमाले संसदीय दलका नेता जगन्नाथ थपलियाको नेतृत्वमा पाँच सदस्यीय कार्यदल गठन गरिएको छ। कार्यदलले राप्रपासहित प्रदेशसभामा प्रतिनिधित्व गर्ने अन्य दलसँग पनि छलफल र समन्वय गर्नेछ।
यसअघि जगन्नाथ थपलियाविरुद्ध दर्ता भएको अविश्वास प्रस्ताव फिर्ता लिइएको थियो। थपलियालाई संसदीय दलको नेताकै रूपमा कायम राख्दै मुख्यमन्त्रीमा भने किरण थापालाई अघि बढाउने सहमति भएको हो।
भदौ ४ गतेको समयसीमाभित्र बहुमत जुटाएर दाबी पेस गर्नुपर्ने भएकाले बागमतीको सत्ता राजनीतिमा आगामी दुई दिन निर्णायक हुने देखिएको छ।
