मकवानपुरको हेटौँडाबाट सशस्त्र प्रहरीले पेस्तोलसहित दुईजनालाई नियन्त्रणमा लिएको छ । सशस्त्र प्रहरी बल, नेपाल नं. १४ गण हेडक्वार्टर मकवानपुर र सशस्त्र प्रहरी बल नेपालको इन्टेलिजेन्स ब्युरोबाट खटिएको संयुक्त टोलीले हेटौँडा उपमहानगरपालिका–१ चौकीटोलबाट उनीहरूलाई नियन्त्रणमा लिएको हो ।
शनिबार दिउँसो करिब १२ः१५ बजे बा.प्र.०३–००१ ह ११८१ नम्बरको अटो जाँच गर्ने क्रममा भाग्न खोजेपछि इन्टेलिजेन्स ब्युरोबाट खटिएको टोलीले एक राउन्ड हवाई फायर गरेको थियो ।
त्यसपछि टोलीले अटोमा सवार मकवानपुरको मनहरी गाउँपालिका–६ नयाँबस्तीका २७ वर्षीय सुनबहादुर तामाङ र २२ वर्षीय विश्वराज तामाङलाई नियन्त्रणमा लिएको हो ।
उनीहरूको साथबाट ७.६५ एमएम क्यालिबरको एक थान सेमी अटोमेटिक पेस्तोल, एक थान म्यागजिन र ७.६५ एमएमको एक राउन्ड गोली बरामद गरिएको सशस्त्र प्रहरीले जनाएको छ ।
