राष्ट्रिय स्वतन्त्र पार्टी (रास्वपा) की सांसद आशिका तामाङले आफ्ना पुराना भिडियोहरूलाई लिएर सामाजिक सञ्जाल र सञ्चारमाध्यममा भइरहेको आलोचनाप्रति कडा आपत्ति जनाएकी छन् । केही दिनयता आफू विगतमा विभिन्न सार्वजनिक गतिविधिमा संलग्न रहेका भिडियोहरू बाहिरिएपछि सांसद तामाङले सामाजिक सञ्जाल (फेसबुक) मार्फत स्पष्टीकरण दिँदै आलोचकहरूमाथि आक्रोश पोखेकी हुन् ।
सांसद तामाङले आजभन्दा ११ महिनाअघि आफू कुनै पनि दलको कार्यकर्ता नभई एक सचेत नागरिकको हैसियतमा समाजका विकृति–विसङ्गतिविरुद्ध खरो रूपमा प्रस्तुत भएको स्मरण गराएकी छन् । आफू व्यक्तिगत स्वार्थका लागि राजनीतिमा नआएको स्पष्ट पार्दै उनले आफु यहाँ राजनीति गर्न नआएको बताएकी छन् ।
