भदौ १० गते आएको भोटेकोशी बाढी तथा पहिरोका कारण धादिङका निजी तथा संस्थागत विद्यालय (प्याब्सनअन्तर्गत) मा अध्ययनरत विद्यार्थी तथा उनीहरूका परिवार प्रभावित भएका छन् । प्याब्सन धादिङअन्तर्गतका विद्यालयबाट संकलन गरिएको पहिलो चरणको प्रारम्भिक विवरणअनुसार बाढी तथा पहिरोबाट २४२ परिवार तथा विद्यार्थी प्रभावित भएका हुन् । तीमध्ये ३५ जना विद्यार्थीले अभिभावक गुमाएका छन् भने १४२ परिवारका घर पूर्ण रूपमा क्षतिग्रस्त भएका छन् । त्यस्तै, ६५ परिवारका घरमा पानी तथा हिलो पस्दा किताब, कापी, कपडा लगायतका सामग्रीमा क्षति पुगेको प्याब्सन धादिङका अध्यक्ष दिनेश भट्टले बताउनुभयो ।
अभिभावक गुमाएका विद्यार्थीको संरक्षणमा विशेष ध्यान आवश्यक
प्याब्सन धादिङले बाढी तथा पहिरोबाट अभिभावक गुमाएका ३५ जना विद्यार्थीको अवस्था अत्यन्त संवेदनशील रहेको जनाएको छ । अभिभावकको संरक्षण गुमाएका बालबालिकाको शिक्षालाई निरन्तरता दिनु, उनीहरूको मनोसामाजिक अवस्था बुझ्नु तथा आवश्यक पारिवारिक र शैक्षिक सहयोगको व्यवस्था गर्नु सम्बन्धित विद्यालय, स्थानीय सरकार, विद्यालय सञ्चालक, अभिभावक तथा सामाजिक संघसंस्थाको साझा जिम्मेवारी बन्न पुगेको कोषाध्यक्ष सञ्जिव गजुरेलले बताउनुभयो ।
गजुरेलका अनुसार यी विद्यार्थीलाई तत्काल राहत उपलब्ध गराउनुका साथै उनीहरूको दीर्घकालीन शिक्षण–सिकाइ र संरक्षणलाई प्राथमिकतामा राख्नुपर्ने आवश्यकता देखिएको छ ।
१४२ घर पूर्ण रूपमा क्षतिग्रस्त
प्रारम्भिक विवरणअनुसार १४२ परिवारका घर पूर्ण रूपमा क्षति भएका छन् । घर गुमाएका परिवारका विद्यार्थीहरूलाई विद्यालय जान, अध्ययन सामग्री सुरक्षित राख्न तथा नियमित शैक्षिक गतिविधिमा सहभागी हुन थप कठिनाइ उत्पन्न हुन सक्ने देखिएको प्याब्सन धादिङले जनाएको छ । यस्ता परिवारलाई राहत सामग्री, अस्थायी आवास, शैक्षिक सामग्री तथा आवश्यक आर्थिक सहयोग उपलब्ध गराउन सम्बन्धित निकायको समन्वय आवश्यक रहेको प्याब्सन धादिङका अध्यक्ष दिनेश भट्टको भनाई छ ।
यस्तै घर पूर्ण रूपमा क्षति नभएपनि बाढीका कारण दैनिक जीवन र विद्यार्थीको अध्ययनमा प्रत्यक्ष असर परेको भन्दै प्याब्सन धादिङका अध्यक्ष भट्टले यस्ता विद्यार्थीलाई नयाँ किताब–कापी, पोसाक, झोला तथा आवश्यक शैक्षिक सामग्री उपलब्ध गराउन विद्यालय र सहयोगी संस्थाहरूले विशेष कार्यक्रम सञ्चालन गर्नुपर्ने बताउनुभयो ।
राहत तथा पुनःस्थापनामा प्याब्सनको भूमिका
बाढीपीडित विद्यार्थी तथा परिवारको अवस्था पहिचान गर्न गरिएको पहिलो चरणको आँकलनले प्रभावित परिवारको वास्तविक आवश्यकताअनुसार सहयोगको योजना बनाउन आधार प्रदान गरेको छ । आगामी चरणमा थप विवरण संकलन, क्षतिको प्रमाणीकरण तथा प्रभावित विद्यार्थीको आवश्यकताअनुसार राहत वितरणको कार्यलाई अगाडि बढाउनुपर्ने देखिएको कोषाध्यक्ष सञ्जिव गजुरेलको भनाई छ ।
प्याब्सनअन्तर्गतका विद्यालय, स्थानीय तह, सामाजिक संघसंस्था, सहयोगी व्यक्ति तथा सरोकारवाला निकायबीच सहकार्य गरी प्रभावित विद्यार्थीलाई अध्ययनबाट वञ्चित हुन नदिने वातावरण निर्माण गर्नुपर्ने आवश्यकता रहेको बताईएको छ ।
