धादिङ । गल्छी गाउँपालिकाले प्राकृतिक विपद्का कारण उत्पन्न विषम परिस्थितिको फाइदा उठाउँदै उपभोक्ताबाट मनपरी मूल्य असुल नगर्न गाउँपालिकाभित्रका होटल तथा व्यवसायीलाई आग्रह गरेको छ। गाउँपालिकाले आइतबार सूचना जारी गर्दै हालै आएको बाढी, पहिरो तथा डुबानलगायतका प्राकृतिक विपद्का कारण गल्छी गाउँपालिका क्षेत्र प्रभावित भएको जनाएको छ।
भारी वर्षाका कारण सर्वसाधारणहरू होटलमा बस्न बाध्य भइरहेका तथा मजदुर र यात्रुहरू अलपत्र परिरहेको अवस्थामा केही होटल तथा व्यवसायीले बजार मूल्यभन्दा बढी मूल्य लिएर सामान तथा सेवा बिक्री–वितरण गरिरहेको जनगुनासो आएको गाउँपालिकाले जनाएको छ।
गाउँपालिकाका प्रमुख प्रशासकीय अधिकृत पूर्णप्रसाद दुलालद्वारा जारी सूचना अनुसार यस्तो अवस्थामा व्यवसायीहरूले मानवीय संवेदनशीलतालाई आत्मसात् गर्दै सुपथ मूल्यमा सेवा तथा आवश्यक सामग्री उपलब्ध गराउन आवश्यक रहेको र होटल तथा अन्य व्यवसायीहरूलाई विपद्को समयमा नागरिकको समस्यालाई ध्यानमा राख्दै सहयोग गर्न आग्रह गरिएको हो ।
हेर्नुहोस् सुचना :
