काबुल । अफगानिस्तानको राजधानी काबुलको शास दराक क्षेत्रमा बिहीबार भएको एक कार बम विस्फोटका परी कम्तीमा १२ जनाको मृत्यु भएको छ । स्थानीय समयानुसार बिहीबार बिहान १०ः१० बजे बिस्फोट भएको जनाइएको छ । बिस्फोटमा परी अन्य कैयौ व्यक्ति घाइते भएका छन् । उक्त विस्फोट प्रहरीचौकीनजिकै भएको थियो । विस्फोट भएको सो स्थानमा राष्ट्रिय सुरक्षा निर्देशनालयको कार्यालय, अमेरिकी दूतावास र नेटोको नेतृत्वमा रहेका सेनाहरु रहेका थिए । अफगानिस्तानमा सरकारसँग द्वन्द्व जारी राखेका तालिबान लडाकू समूह र वासिङ्टनबीच शान्ति सम्झौता अन्तिम चरणमा पुग्न लागेको अस्थावमा अफगानिस्तानको राजधानीमा पुनः बिस्फोटका घटनाहरु भइररहेका छन् । काबुलको आवासिय क्षेत्रमा गत सोमबार मात्रै भएको एक विस्फोटमा परी कम्तीमा १६ सर्वसाधारण मारिएका थिए । उक्त विस्फोटमा अन्य १ सय १७ व्यक्ति घाइते भएका थिए । बिहीबार भएको कार बम विस्फोट केही दिनयता तालिबान लडाकूले गरेको चौथो ठूलो आक्रमण हो । सप्ताहन्तमा अफगानिस्तानको उत्तर भागमा पर्ने दुई प्रमुख शहरमा भएका भीषण आक्रमणमा दर्जनौं सुरक्षाबल र नागरिकहरु मारिनुको साथै घाइते भएका छन् । अल कायदा विद्रोही समूहले सन् २००१ सेप्टेम्बर ११ मा न्युयोर्क शहरमा अवस्थित ट्वीन टावर आक्रमणपछि अमेरिकी सेनाले अफगानिस्तानमा आक्रमण गरेको थियो । उक्त समयमा एक लाख ३० हजारभन्दा बढी अमेरिकाको नेतृत्वमा नेटो सेना अफगानिस्तानमा प्रवेश गरेका थिए । सन् २०१४ को डिसेम्बरमा ‘अफगान युद्ध’ सकिएको घोषणा गर्दै प्रायःनेटो सेना अफगानिस्तानबाट आ–आफ्नो देश फर्किएका थिए । सोही समयबाट हालसम्म करिब १४ हजार अमेरिकी सेना अझै अफगानिस्तानमा रहेका अमेरिकाको रक्षा मन्त्रालय पेन्टागनले पुष्टि गरेको थियो । ठूलो सङ्ख्यामा नेटो आवद्ध सेना अफगानिस्तानबाट फर्केपछि यहाँ सुरक्षाकर्मी, सरकारी अधिकारी र सर्वसाधारण जनता लक्षित आक्रमणका घटना बढेका छन् । २०७६ भदौ १९ गते प्रकाशित