रसुवा–नुवाकोट क्षेत्रको पर्यटन प्रवर्द्धन गर्ने उद्देश्यसहित लाङटाङ ट्रेल रन आयोजना हुने भएको छ । रसुवा–नुवाकोट पर्यटन समाजद्वारा बिहीबार आयोजित पत्रकार सम्मेलनमा प्रतियोगिता आगामी जेठ २३ गते हुने जानकारी दिइएको हो ।
आयोजक समाजका अध्यक्ष बलराम न्यौपानेले लामो समयदेखि लाङटाङ क्षेत्रको पर्यटन विकास, अध्ययन, प्रचारप्रसार तथा प्रवर्द्धनमा सक्रिय रहँदै आएको समाजले यसपटक साहसिक खेल पर्यटनलाई केन्द्रमा राख्दै ट्रेल रन आयोजना गर्न लागेको बताए ।
०७२ को विनाशकारी भूकम्पपछि प्रभावित पर्यटन क्षेत्रलाई पुनर्जीवित गर्ने प्रयासस्वरूप विभिन्न कार्यक्रम गर्दै आएको समाजले अब लाङटाङलाई अन्तर्राष्ट्रियस्तरको साहसिक गन्तव्यका रूपमा स्थापित गर्ने लक्ष्य लिइएको जनाइएको छ ।
प्रतियोगिता गोसाइँकुण्ड गाउँपालिकाअन्तर्गत पर्ने क्यान्जिन गुम्बाबाट सुरु भई स्याफ्रुबेँसीसम्म करिब ३२ किमि दूरीमा सम्पन्न हुने समाजका अध्यक्ष न्यौपानेले जानकारी दिए । समुद्री सतहबाट करिब ३,८७० मिटर उचाइमा रहेको क्यान्जिन गुम्बाबाट सुरु हुने यो दौड लाङटाङ गाउँ, घोडातबेला हुँदै स्याफ्रुबेँसीसम्म आइपुग्नेछ ।
आयोजकका अनुसार, प्रतियोगितामा राष्ट्रिय तथा अन्तर्राष्ट्रिय धावकहरूको सहभागिता रहनेछ । यस ट्रेल रनले लाङटाङ क्षेत्रको अन्तर्राष्ट्रिय पहिचान मजबुत बनाउने, स्थानीय पर्यटन व्यवसायलाई चलायमान बनाउने तथा साहसिक खेलमार्फत नयाँ सम्भावना खोल्ने विश्वास आयोजकले लिएको छ । राससबाट
