जिल्ला प्रशासन कार्यालय धादिङले सम्पूर्ण जिल्लावासी तथा यात्रुहरूलाई उच्च सतर्कता अपनाउन आग्रह गरेको छ। प्रशासनले सार्वजनिक सूचना जारी गर्दै पहिरो, भू-क्षय, सडक अवरोधका साथै नदी, खोला तथा खोल्साहरूमा अकस्मात् बाढी र डुबान आउन सक्ने जोखिम बढेको जनाएको छ।
अत्यावश्यक कामबाहेक जोखिमयुक्त स्थानमा अनावश्यक यात्रा नगर्न अनुरोध गर्दै प्रशासनले यात्रा गर्नै परेमा सडकको अवस्था, मौसम र सम्भावित जोखिमबारे पूर्वजानकारी लिएर मात्र निस्कन आग्रह गरेको छ। साथै, नदी, खोला, खोल्सी तथा पहिरो जान सक्ने स्थानमा नगउन र जोखिम मोलेर यात्रा नगर्नसमेत आग्रह गरिएको छ।
जिल्लाभित्र बाढी, पहिरो, डुबान, सडक अवरोध वा अन्य विपद्जन्य घटना घटेमा तत्काल स्थानीय तह, सुरक्षा निकाय वा जिल्ला प्रशासन कार्यालयमा खबर गर्न प्रशासनले अनुरोध गरेको छ।आपत्कालीन अवस्थामा नेपाल प्रहरी हटलाईन १००, सशस्त्र प्रहरी बल नेपाल १११४, जिल्ला आपत्कालीन सञ्चालन केन्द्र (DEOC) १२३४ वा ०१०-५२१४६४, जिल्ला प्रहरी कार्यालय धादिङ (सूचना अधिकारी) ९८५१२२९८६० र जिल्ला ट्राफिक प्रहरी कार्यालय धादिङको ९८५१३२२५६४ मा सम्पर्क गर्न सकिने सूचनामा उल्लेख छ।
