धादिङको धुनिवेशी नगरपालिकामा १६औँ राष्ट्रपति रनिङ शिल्ड प्रतियोगिता सुरु भएको छ । नगरपालिकाका प्रमुख बालकृष्ण आचार्यको अध्यक्षतामा भएको उद्घाटन समारोहमा जिल्ला खेलकुद विकास समिति धादिङका अध्यक्ष प्रतापसिंह तामाङको विशेष आतिथ्यता र विभिन्न व्यक्तिहरुको आतित्थ्यता रहेको थियो ।
धुनिवेशी खेल मैदानमा सुरु भएको प्रतियोगितामा नगरपालिकाभित्रका २१ माध्यमिक विद्यालयका करिब ८ सय विद्यार्थी खेलाडी सहभागी हुने भएका छन् ।
प्रतियोगितामा ५४ स्वर्ण पदकका लागि प्रतिस्पर्धा हुनेछ । प्रतियोगितामा प्रथम हुने विद्यालयले ३० हजार, द्वितीय हुनेले २० हजार र सान्त्वना हुने विद्यालयले १५ हजार रुपैयाँ पुरस्कार प्राप्त गर्नेछन् ।
गत वर्षको १५औँ राष्ट्रपति रनिङ शिल्ड प्रतियोगितामा भुवनेश्वरी माध्यमिक विद्यालय च्याम्पियन बनेको थियो ।
