धादिङका दुई विद्यालयका एक सय ७३ जना विद्यार्थीलाई शैक्षिक सामग्री तथा भोटेकोशी बाढी प्रभावित पाँच परिवारलाई राहत सामग्री सहयोग गरिएको छ। प्रयास नेपाल धादिङको व्यवस्थापन र सहयोगी दाताहरूको सहकार्यमा उक्त सामग्री वितरण गरिएको हो।
धादिङको गजुरी गाउँपालिका–२ पुर्ख्यौली घर भई हाल आयरल्यान्ड निवासी टीका कँडेलका छोरा निर्माण कँडेलको नेतृत्वमा विदेशी साथीहरू जोन डोयल र जेम्स डोयल लगायतको सहयोगमा सामग्री हस्तान्तरण गरिएको हो।
सिद्धलेक गाउँपालिका–६ स्थित गोल्मारानी आधारभूत विद्यालयका ७८ जना र गजुरी गाउँपालिका–२ स्थित जनजागृति आधारभूत विद्यालयका ९५ जना विद्यार्थीलाई शैक्षिक सामग्री प्रदान गरिएको प्रयास नेपालले जनाएको छ।
यसैगरी, गजुरी गाउँपालिका–१ का भोटेकोशी बाढी प्रभावित पाँच परिवारलाई पनि आवश्यक राहत सामग्री उपलब्ध गराइएको छ। सामग्री हस्तान्तरण कार्यक्रममा सिद्धलेक गाउँपालिका–६ का वडाध्यक्ष सुरेन्द्र मगर, स्थानीय प्रतिनिधिहरू तारा भण्डारी, दोण कँडेल लगायतको उपस्थिति रहेको थियो।
कार्यक्रममा बोल्दै सिद्धलेक-६ का वडा अध्यक्ष सुरेन्द्र मगरले प्राप्त सहयोगले विद्यार्थीको सिकाइ निरन्तरतामा मद्दत पुग्नुका साथै बाढी प्रभावित परिवारको दैनिक जीवनयापन सहज बनाउन ठूलो राहत मिलेको बताउनुभयो।
