धादिङ । धुनिवेशी नगरपालिकाद्वारा आयोजित १६औँ नगरस्तरीय राष्ट्रपति रनिङ शिल्ड प्रतियोगिता–२०८३ सम्पन्न भएको छ । प्रतियोगितामा उत्कृष्ट प्रदर्शन गर्दै भुवनेश्वरी माध्यमिक विद्यालयले प्रथम स्थान हासिल गरेको छ ।
प्रतियोगितामा भुवनेश्वरी मावि पुरानोधार्के १४ स्वर्ण, ८ रजत र ७ कांस्य गरी कुल २९ पदक जित्दै पहिलो स्थान सुरक्षित गरेको हो । त्यसैगरी, मच्छिन्द्र माध्यमिक विद्यालय खानिखोलाले १० स्वर्ण, १० रजत र १० कांस्य गरी कुल ३० पदकसहित दोस्रो स्थान हासिल गरेको छ ।
महेशधर्म माध्यमिक विद्यालय पुरानोडाँडाले ६ स्वर्ण, ४ रजत र १० कांस्य गरी कुल २० पदक जित्दै तेस्रो स्थान हासिल गर्न सफल भएको छ । धेरै पदक जिते पनि स्वर्ण पदकको सङ्ख्याका आधारमा विद्यालयहरूको स्थान निर्धारण गरिएको प्रतियोगिताको नतिजाले देखाएको छ ।
चौथो स्थानमा महेन्द्रोदय माध्यमिक विद्यालय मैदानले ४ स्वर्ण, ९ रजत र ३ कांस्य गरी १६ पदक प्राप्त गरेको छ । पाँचौँ स्थानमा त्रिकुटेश्वरी माध्यमिक विद्यालय तेस्रेपानीले ४ स्वर्ण, २ रजत र ३ कांस्य गरी ९ पदक प्राप्त गरेको छ ।
त्यस्तै, महांकालेश्वरी माध्यमिक विद्यालय छापडाँडा छैटौँ, महादेवस्थान माध्यमिक विद्यालय कुमाईखोला सातौँ, गुडस्टार्ट इङ्लिस स्कुल धार्के आठौँ, डियरवाक धादिङ विद्यालय टायलघर नवौँ र महेन्द्रोदय माध्यमिक विद्यालय चिलाउनेगाउँ दशौँ स्थानमा रहेका छन् ।
प्रतियोगितामा सहभागी विद्यालयहरूले कुल ५४ स्वर्ण, ५४ रजत र ५९ कांस्य गरी १६७ पदकका लागि प्रतिस्पर्धा गरेका थिए । समग्रमा विजेता तथा विषयगत खेलका रुपमा प्रथम दृतिय र तृतिय हुने विद्यालय र विद्यार्थीलाई शिल्ड, मेडल र प्रमाणपत्रका साथमा सम्मान गरिएको थियो ।
धुनिवेशी नगरपालिकाका नगरप्रमुख बालकृष्ण आचार्यको अध्यक्षतामा सम्पन्न भएको कार्यक्रममा शिक्षा विकास तथा समन्वय एकाई धादिङका प्रमुख कृष्ण कुमार श्रेष्ठको विशेष आतित्थ्यता रहेको थियो । कार्यक्रममा जनप्रतिनिधी, विभिन्न विद्यालयका प्रधानाध्यापक तथा प्रतिनिधी, विभिन्न व्यक्ति, व्यत्तित्व तथा सरोकारवालाको आतित्थ्यता रहेको थियो ।
नगरस्तरीय राष्ट्रपति रनिङ शिल्ड प्रतियोगिताले विद्यार्थीमा रहेको खेल प्रतिभा पहिचान तथा प्रस्फुटन गर्न, खेलकुदप्रति आकर्षण बढाउन र विद्यालयस्तरबाटै दक्ष खेलाडी उत्पादन गर्न महत्वपूर्ण योगदान पु¥याउने अपेक्षा गरिएको छ ।
