मनहरी । मकवानपुरको मनहरी गाउँपालिका खरको छानोमुक्त हुने भएको छ । गाउँपालिकालाई खरको छानोमुक्त बनाउन सुरु गरेको यो अभियानका लागि गाउँपालिकाले चालु आर्थिक बर्ष २०७७/७८ मा पनि बजेट विनियोजन गरेको छ ।
आर्थिक अभावमा खर, छ्वाली तथा स्याउलाले छाएको घरमा बस्न बाध्य भएका नागरिकका लागि मनहरी गाउँपालिकाले ‘जनमुखी जनता आवास कार्यक्रम’ सञ्चालन गरिरहेको हो । यस कार्यक्रम अन्तर्गत गाउँपालिकालाई खरको छानोमुक्त बनाउने योजना रहेको छ । गत आर्थिक बर्ष २०७६/७७ मा २ सय घर परिवारले जस्तापाता पाएका छन् ।
कोभिड १९ (कोरोना भाइरस) संक्रमणका कारण धेरैले खर हटाएर जस्ता लगाइसकेका छन् भने केहीले बर्षाको मौसममा अहिले पनि वडामार्फत जस्ता लिएर काम गरिरहेका छन् । अहिले पनि जस्तापाता वितरण भैरहेको छ । २०७६/७७ मा दुईसय घरलाई जस्ता वितरण गर्ने योजना थियो । त्यसको पनि वितरण कार्य भइरहेको गाउँपालिका अध्यक्ष एकराज उप्रेतीलेबताउनु भएको छ । उहाँले ‘चालु आर्थिक बर्षका लागि पनि दुईसय घरपरिवारलाई जस्तापाता दिने लक्ष्य रहेको बताएका छन । उहाँले सोही अनुसार कार्यक्रम बनाएर बजेट विनियोजन गरेको बताउनु भएको छ ।
गत बर्ष प्रत्येक वडाका २२ घरपरिवारलाई जस्ता बाँडिएको हो । गाउँपालिकाको ३, ८ र ९ नम्बर वडा खरको छानोमुक्त भैसकेको गाउँपालिका अध्यक्ष उप्रेतीले जानकारी दिनु भएको छ । खरको छानोमुक्त अभियानका लागि गाउँपालिकाले प्रत्येक बर्ष ४० लाख रुपैयाँ बजेट विनियोजन गर्दै आएको छ । चालु आर्थिक बर्षका लागि पनि ४० लाख नै छुट्याएको छ । गाउँपालिकाको यो अभियानका लागि प्रदेश सरकार र संघीय सरकारले पनि सहयोग गरिरहेको अभ्यक्ष उप्रेतीले बताएका छन ।
