धादिङ । नियमित बजार अनुगमनका क्रममा धुनिवेशी नगरपालिकाको ३ वटा फर्म तथा पसललाई कारवाही गरिएको छ । खानिखोलाको २ र धार्केको १ वटा पसललाई कारवाही गरिएको सहायक प्रमुख जिल्ला अधिकारी तथा अनुगमन टोलीका सँयोजक गोकर्ण प्रसाद उपाध्यायले बताउनुभयो ।
अनुगमनका क्रममा १० किसिमका म्याद गुज्रिएका सामानहरु फेला परेका, बिक्री बिल देखाउन नमानेको, असहयोग गरेको, गोदाममा समेत अखाद्य वस्तुहरु राखिएको पाइएकोले ए.आर. इन्टरप्राइजेज खानीखोलालाई १५ हजार जरिवाना गरिएको अनुगमन टोलीका सँयोजक उपाध्यायको भनाई छ ।
उहाँका अनुसार अनुज्ञापत्र नलिएको, सरसफाईमा पूर्ण लापरबाही गरेको, नापतौल प्रमाणित नगरी प्रयोग गरेको,उत्पादनमा लेबल नलगाएको र कोभिड १९ को स्वास्थ्य मापदण्ड पुरा नगरेको पाइएकोले मच्छिन्द्रनाथ डेरी उद्योग खानीखोलालाई १० हजार जरिवाना गरिएको छ ।
यस्तै आवश्यक मापदण्ड पुरा नगरेको, सप्लायर्सको रूपमा दर्ता गरी डेरी संचालन गरेको, कोभिड–१९ को स्वास्थ्य तथा सुरक्षा मापदण्ड पुरा नगरेको, सरसफाईमा बेवास्ता गरेको पाईएकोले पर्याप्त सल्लाह, सुझाव र निर्देशन सहित धार्केमा रहेको आरम्भ सप्लायर्स (डेरी) लाई रू. १० हजार जरिवाना गरिएको अनुमगन टोलीले जनाएको छ ।
अनुगमन टोलीले बुधबार र विहिबार गरेको अनुगमनका क्रममा तिन पसललाई कारवाहि गरिएको हो । धादिङमा करिव दुई महिनादेखी जिल्ला प्रशासन, घरेलु कार्यालय लगायतको सहकार्यमा निरन्तर रुपमा अनुगमन भैरहेको छ ।
यो पनि हेर्नुहोस्...
